Мамырбаева Дiлдәр Жанысбайқызы 1957 жылы 11 қыркүйекте туған. 1979 жылы ҚазМУ-дiң журналистика факультетiн бiтiргеннен кейiн еңбек жолын Жамбыл облысы Красногор аудандық газетiнде бөлiм меңгерушiсi болып бастады. 1988 жылы Алматы қаласына келiп,  республикалық «Қазақстан мектебi» журналына қызметке орналасты. Бұдан кейiнгi жылдары  ҚР Ауылшаруашылығы министрлiгiнiң «Ауыл» газетiнде бөлiм редакторы, редактордың орынбасары, бас редакторы, республикалық психологиялық «Ұлағат» журналының бас редакторы, «Жаңа ғасыр» журналының бөлiм меңгерушісі, Қазақстан Жазушылар одағының  «Жұлдыз» журналында бөлiм меңгерушісі  болып қызмет iстедi.

Қазақстан Жазушылар одағы мен Қазақстан Журналистер одағының мүшесі.  

2010 және 2013 жылдардағы балаларға арналған Халықаралық «Дарабоз» бәйгесiнің, 2013 жылы «Қазақмыс Корпорациясы» мен Қазақстан Жазушылар одағы   ұйымдастырған  «Балауса» бәйгесінің жүлдегері.

2021 жылы «Роботтар отбасы» кітабы үшін Халықаралық  «Алаш» сыйлығының, 2021 жылы  «Ер Төстік» атты балалар мен жасөспірімдерге арналған шығармалар байқауында Жүсіпбек Аймауытов атындағы сыйлық, 2021жылы «Роман&драма» әдеби көркем журналының Ахмет Йассауи атындағы сыйлығына ие болған.

Қазақ тілі терминдерінің салалық ғылыми түсіндірме сөздігіне «Педагогика және психология» саласы бойынша авторлар ұжымының мүшесі.

ҚР Мәдениет қайраткері,  «Қазақстан  тәуелсіздігіне 30 жыл»  мерекелік медалінің, «Ерен еңбегі үшін» медалінің  иегері.

«Өмірдің ағы мен қарасы», «Сағыныш, сағым, ғұмыр-ай», «Қош бол, балалық», «Махаббаттың ақ жауыны», «Әке мен бала», «Роботтар отбасы» деген кітаптардың авторы.